Laing 37 classrooms nga School Buildings tukoron sa Comval

Aron matubag sa Compostela Valley ang padayong nagdako nga panginahanglan ug classroom sa pampublikong mga tulunghaan sa Compostela Valley, laing 37 classrooms nga school buildings na sad ang gitakdang tukoron sa probinsiya  ilalom sa Bayanihan sa Paaralan (BSP) Program ni Gov. Arturo “Chiongkee” Uy.

Matud ni Executive Assistant Raul Timogtimog  nga kasagaran niining proyektoha giimplementar sa probinsiya ilalom sa Bayanihan Sa Paaralan (BSP) Program sa gobernador.

Nagsugod na gyod matud pa ang construction, ug unom gyod dayon ka classroom nga Kindergarten School Buildings ang gidungan pagpabarog sa probinsiya ug sa mga katawhan niadtong Pebrero 28  diha sa pampublikong mga tulunghaan sa  Elementarya sa mga lungsod sa Pantukan, sa Mabini, ug sa Compostela.

Dugang niini ang lain pang usa ka classroom nga Kindergarten School Building diha sa Katipunan Elementary School sa Maragusan nga gisugdan sad pagtukod sa probinsiya ug sa naghiusang mga katawhan niadtong Marso 1,2012.

Apan giklaro ni Timogtimog nga initial pa lang ang gidaghanon sa gipagulang listahan tungod sa gilaomang mga pribadong sector nga manghatag sad ug mga School Buildings sa Comval karong tuiga. (gilbert cabahug/ids comval)