Dredging equipment sa DPWH gamiton sa Comval aron paspas mahabwa ang lapok sa mga suba ug kasapaan

Compostela Valley Province – Sa dili madugay pagahimoon ang labing paspas nga pagpanghabwa sa lapok (dredging) sa mga suba ug kasapaan sa Comval gamit ang bag-ong Dredging Equipment sa Department of Public Works and Highways (DPWH).

Kini human naaprobahan sa Comval SP atol sa 59th Regular Session nga temporaryong gipanguluhan sa Acting Vice Governor nga si Senior Board Member Tyron Uy, ang gihimong kasabotan tali sa probinsiya ug sa DPWH alang sa himoong pagtinabangay sa paspas nga pagpanghabwa sa mga lapok diha sa mga suba ug kasapaan sa 11 ka mga lungsod sa probinsiya gamit ang usa ka bag-o ug giilang usa sa pinakamodernong Dredging Equipment nga gipalit sa DPWH.

Gisulti mismo sa Acting Governor niadtong Sept.29,2014 nga si Vice Gov. Manuel “Way Kurat” Zamora panahon sa iyang paghatag sa Vice Governor’s Report, nga gawas bag-o ang Dredging Equipment nga ipagamit sa DPWH usa sad kini sa pinakamodernong kahimanan.

Matud pa usab niya nga ang maong Dredging Equipment adunay talagsaong  kapabilidad alang sa maong buluhaton, ug pinakaubos ang 450 metro kubikong gidaghanon sa lapok ang mahabwa sulod lang sa usa ka adlaw sa pinakagamayng magasto sa probinsiya nga kapin P19.00 lang matag cubic meter.

Plano nila ni Gov. Arturo “Chiongkee” Uy nga human mapirmahan ang gihimong kasabotan maoy unahon paghabwa ang lapok sa mga suba ug kasapaan sa Compostela nga misamot ug kamabaw human nga kini nasudlan sa mas dakong deposito sa lapok(silts) nga nadala sa higanteng debris flow gikan sa New Bataan nga maoy pinakagrabeng nahitabo panahon sa pagpanghasi sa milabayng Bagyong Pablo. (gilbert cabahug/ids comval)