Raul Timogtimog SP Member na sa ComVal

by Gilbert M. Cabahug

COMPOSTELA VALLEY PROVINCE-----Tungod maoy napiling Presidente sa Philippine Councilors’ League (PCL)- ComVal Chapter sa milabay’ng PCL Election nga malampusong gihimo didto sa De Leonor Inland Resort and Adventure Pad sa Buhangin Davao City niadtong Agusto 2, 2013, napromotar na karon ngadto sa pagka Sangguniang Panlalawigan Member si SB Member Raul  C. Timogtimog.

Sa milabay’ng PCL Election si Timogtimog maoy napiling presidente pinaagi sa 97 nga botong pabor kaniya gikan sa 108 ka SB Members nga mitambong niini panahon sa ilang PCL Meeting nga gidumala mismo ni DILG Provincial Director Liborio Diana.

Napili sad nilang Bise Presidente si SB Member Raul B. Basañes sa Monkayo; ilang Secretary General si SB Member Maribel D. Basadre sa Pantukan; Treasurer si SB Member Elmer L. Tabingo sa Compostela; Auditor si SB Member Ramsha Rhesa A. Navarro sa Laak; P.R.O. si SB Member Miles A. Atugan sa Montevista; ug Business Manager si SB Member Jesus T. Gabonan sa New Bataan.

Samtang maoy napiling Provincial Federation Directors sila SB Members Atty. Carlo D. Ancla sa Nabunturan; Heidee Suarez-Jimenes sa Compostela; Maricel Colina-Vendiola sa Maragusan; Welden G. Sapanta sa Pantukan; Domingo M. Estrada sa Monkayo; Anthony M. Sebumpan sa Maco; Larry B. Pagalan sa New Bataan; Danilo Requillo sa Montevista; Bernardo U. Estoesta sa Mawab;  Nestor L. Abellanida sa Laak; ug Isabelo D. Perez Jr. sa Mabini.

Sa pagsugod ug lingkod ni Governor Arturo “Chiongkee” Uy niadtong 2007 isip gobernador sa ComVal, si SP Member Timogtimog maoy iyang gitudlo pagdumala sa  Community Affairs Development Section (CADS) ilalom sa Provincial Governor’s Office. Kining opisinaha maoy gisaligan sa mga mahinungdanong buluhaton sa gobernador sa paghatud sa gikinahanglang serbisyo sa katawhan diha sa community, ug ang mga PCRO nga sakop niining opisinaha nakatabang ug dako sa ubang mga opisina sa public service delivery pinaagi sa mas gipahugtang koordinasyon ug pagpakiglambigit sa ilang mga trabaho.

Ang iyang talagsaong kakugi human sa pagtudlo ni Gov. Uy kaniya nga USWAG GK Action Officer nakatabang ug dako aron siya usab maila sa katawhan sa public service delivery. Kini miresulta sa iyang kadaugan ingon nga no.1 Sangguniang Bayan Member sa Maco human sa Mayo 13, 2013 nga  piniliay.  (Gilbert M. Cabahug, ids-comval)